#1

Tinggi tabangnyo si Buruang Bondoh
Tabang mambubuang ka angkasa
Den sangko SMS adiak nan tibo
Kironyo dari mama mintak pulsa

***

#2
Buruang Alang di Sungai Sariak
Tabang mambubuang ka langik sabak
Satiok tabayang senyum manih adiak
Karupuak jariang dikulek raso martabak

***

#3
Ambiak kawek di ateh banto
Kawek nan kuniang duo-duo
Payah bacewek jo panyiar radio
Awak aniang inyo mangecek juo

***

#4
Bali lado pancukuik samba
Samba baluik untuak minantu
Iyo bedo basunguik taba
Tiok sabanta tasapik pintu

***

#5
Merdu bakicau si Buruang Pipik
Pipik bakicau di tangah hari
Asa lai namuah adiak dijapuik
Onda di dealer den baok lari

***

#6
Buruang punai di Sungai Sariak
Baputa-puta mancari alamaik
Tiok tabayang lasuang pipik adiak
Kopi diminum raso jus tomaik

***

#7
Kok dunsanak pai ka Padang
Baokkan bingkuang jadi si buah tangan
Oi adiak janlah galak gadang-gadang
Tengganglah denai ko nan jantuangan

***

#8
Lamak bamain layang-layang
Bamain kalereang kito kamudian
Lamak bapacar jo gadih Sungayang
Tiok maanta dapek durian

***

#9
Datang indak bajapuik
Pulang indak baanta
Asa rokok lai cukuik
Bialah lalok indak babanta

***

#10
Apolah guno saroban
Saroban dikabek paelok laku
Apolah guno koran
Koran dilipek panaba saku

***

#11
Ingin hati pai ka pulau
Tapi pandayuang lah patah pulo
Ingin hati pai ka lapau
Tapi tarompa suok kaduonyo

***

#12
Bialah bakandang lapang
Asa takabek si anak macan
Bialah batarompa japang
Asa di jari mangkilek si batu bacan

***

#13
Pai ka pasa mambali kuini
Untuak dimakan di sanjo hari
Banyak nan tempang jalan urang kini
Dek batu sagadang tinju lakek di jari

***

#14
Dinanti tabang si Buruang Bondo
Sakali tabang jauah malintang
Dinanti adiak ndak kunjuang tio
Sakali tibo managiah utang

***

#15
Tinggi tabangnyo si Buruang Gagak
Hinggok di dahan patah rantiang
Mancaliak pak gaek makan martabak
Talantiang giginyo ka tapi piriang

***

#16
Ombilin jalan ka mudiak
Rami oto basilalu
Salamek maambuih lilin oi adiak
Samoga sehat salalu

***

#17
Sapandai-pandai tupai malompek
Nan pasti ka jatuah juo
Sapandai-pandai adiak mangamek
Nan gigi ompong ka nampak juo

***

#18
Alang tabang di ateh ngarai
Tabang tinggi ka langik sabak
Iyolah malang nasib denai
Baapi-api lai barokok indak

***

#19
Rami urang di Tigo Jango
Rami dek anak gadih-gadih
Iyolah malang nasib denai ko
Bulan mudo pitih lah abih

***

#20
Tasabuik danau singkarak
Iyolah hulu batang ombilin
Dicaliak pariuak nan tingga karak
Pitih lah habih dek batu cincin

***

#21
Rimbun daunnyo batang kuini
Di bawahnyo anak-anak bamain kalereang
Ado-ado sajo mode buya jaman kini
Pasang kopiah dipateleang

***

#22
Iyolah siang tibo di kapalo
Bapayuang kito maambiak cubadak
Iyolah malang tibo di denai ko
Bagayuang lai baraia indak

***

#23
Alah lamo indak ka rimbo
Sakali ka rimbo iyo rimbo cino
Alah lamo indak basuo
Sakali basuo upiak sadang badomino

***

#24
Taratak lalu Simpuruik
Banyak urang mamakai batiak
Paruik litak lapau lah tutuik
Tapaso bakinyam tapi-tapi batu akiak

***

#25
Hujan hari di tangah malam
Patuih jo guruah sahuik-manyahuik
Ka mangopi lampu padam
Galeh kawan nan tasarupuik

***

#26
Iyolah mabuak di padehnyo lado
Dek tamakan sakali duo
Iyolah badabuak jantuang di dado
Dek tacigok dompet di tanggal tuo

***

#27
Kok ragu jalan ka Muaro Tebo
Ancak ditanyo ka nan cadiak
Kok rindu bana ko nan lah tibo
Cacak dipandang tabayang adiak

***

#28
Baa bana di duri bungo
Jikok dipacik arek malakek
Indak dikakok mato takilek
takilek jauh dari pandangan

***

#29
Baa bana di diri nan ko
Denai manjauah adiak mangamek
Denai mandakek adiak malompek
Iyo bedo parasaian badan

***

#30
Bialah jalak di ateh dahan
Asa talarai si buruang angso
Bialah litak nan denai tahan
Asa tabali baterai untuak radio

***

#31
Jikok sanak ka kampuang kuriak
Ambiak durian di ateh batu
Jikok mandanga galak badarai adiak
Akhir bulan saraso tanggal satu

***

#32
Bukan parpatih jadi nahkodo
Tapi tuanku rajo dubalang
Bukan pitih nan indak ado
Tapi saku banyak balubang

***

#33
Bialah tarang di rambang patang
Nan bararak rinai salapeh pagi
Bialah urang nan alah kanyang
Nan wak sato pulo mancukia gigi

***

#34
Rami lapangan dek panampilan ben
Urang banyanyi dari lua nagari
Gigi ompong bakacamotao reben
Kironyo pak gaek mancaliak garhano matoari

***

#35
Tasabuik kain rancak diurai
Kain sutra tanamo dari Toraja
Tadanga adiak galak badarai
Dalam kopatra saraso di ateh apanja

***

#36
Lapek talatak di tapi cawan
Dibali dari lapau si Mon
Gaek manakua di tangah jalan
Kironyo sadang mancari pokemon

***

#37
Urang mudiak manabang pinang
Pinang dihirik ka dalam ladang
Mandanga adiak maimbau sayang
Gata digigik rangik sakatiko ilang

***

#38
Tasabuik rimbo di tangah koto
Lah sabaliak gagak basarang
Sarang dirajuik manjadi kandang

Sabana bedo nasib kawan ko
Lah mulai galak-galak surang
Satiok mancaliak asoy tabang

***

#39
Urang Kuriak pai ka darek
Jalan baduo di ate batu
Tiok mancaliak adiak mangamek
Bulan tuo saraso tanggal satu

***

#40

Manurun jalan ka Sungayang
Mambaok pisang jo buah salak
Ka bakeh urang bakatokan sayang
Bini di rumah kanai bulalak

***

#41
Luruihlah jalan ka Sungayang
Babelok jalan ka Saruaso
Katiko rancak maimbau sayang
Kini lah gapuak baimbau: puso!

***

#42
Tinggi tabangnyo si buruang bondo
Jatuah badarai maimpok buah rambutan
Iyolah bansaik bana iduik denai ko
Oto limo rumah balenggek lapan

***

#43
Tasabuik urang bunian
Bacurito kawan di ateh batu
Cando ko bana parasaian
Baa dek lamo bana tanggal satu

***

#44
Jalan babatu padati diarah
Diarah padati si urang jao
Kironyo tanggal satu almanaek sirah
Karak di pariuak bakikih juo

***

#45
Bungo kananga basalo duri
Nampak ruso bakaki balang
Sabanta bana rasonyo hari
Bulan puaso lah ka datang

***

#46
Sumbahyang zuhur di surau tuo
Ayam mangaram di tapian talago
Nan manjagoan sahur dek alun ado
Tapaso alaram basalek ka talingo

***

#47
Bakirok sawah dek gagak di jarami
Kironyo punai nan sadang manapi
Tasirok darah dek nampak barami-rami
Kironyo amai-amai sadang baselpi-selpi

***

#48
Bialah indak ka pasa
Asalkan lai singgah ka parak
Bialah indak bapulsa
Asalkan lai bakamera rancak

***

#49
Babaliak bajalan si anak gadih
Bajalan baduo di hari sanjo
Dicaliak di efbi adiak nampak manih
Katiko basuo astagfirulloohhh

***

#50
Oi buruang lakehlah tabang
Bia nak bajarak si buah nangko
Oi asok lakehlah ilang
Bia nak nampak jodoh denai ko

***

#51
Elok talipek satungkuih lapek
Lapek dibuek di ateh dandang
Putiah ketek jalannyo capek
Nasi talakek di kapa tabang

***

#52
Kalau ado sumua di ladang
Buliahlah kito manumpang mandi
Kalau ado nan senyum-senyum surang
Tandonyo sadang baselpi-selpi

***

#53
Libur panjang mari ka ladang
Dipanciang baluik tajarek ula
Rambuik panjang madok balakang
Den sangko adiak kironyo uda

***

#54
Pai bajalan ka dalam rimbo
Babelok jalan ka talago
Alah lamo indak basuo
Adiak batambah kemat sajo

***

#55
Dicaliak kain bawarna merah
Dek dipakai pamain pilem
Dicaliak PNS bawajah cerah
Dek acok bulak-baliak ateem

***

#56
Dicaliak pukek nan lah tajarek
Kironyo puyuah di sangkak jariang
Dicaliak dompet nan tampak barek
Kironyo panuah dek pitih dariang

***

#57
Coiko kalau lado si urang buo
Taraso manih dibuek samba randang
Coiko kalau tibo di tanggal tuo
Disuok nasi jo karak goreng pisang

***

#58
Aia pacah batu basibak
Basibak batu ka Batang Pauah
Denai gagah adiak mangilak
Kironyo mato situ nan rabun jauah

***

#59
Sio-sio mambali Bilih
Jikok tabaok lado jo jariang
Sio-sio mancari pitih
Jikok lalok masih jo guliang

***

#60

Dari Pauah nak ka Singkarak
Manjarek Bilih palapeh tanyo
Dari jauah Aliando nan tampak
Pas mandakek Angku Ompong sadang Tik Tok  malah kironyo

***